“Адал азамат” біртұтас тәрбие бағдарламасы аясында, “Наурызнама” онкүндігінің жоспарына сәйкес 16 наурыз – “Мәдениет және ұлттық салт-дәстүр күніне” орай аудандық мәдениет үйінде «Ұлттық мұра – ұрпаққа аманат» атты ұлттық құндылықтарды дәріптеуге арналған тағылымы мол шара ұйымдастырылды.
Аталған шараға мектебіміздің 5-сынып оқушылары қатысып, халқымыздың бай мәдениеті мен салт-дәстүрлері туралы терең мағлұмат алып, ерекше әсермен оралды.
Іс-шара барысында қолөнер шеберлері ұлттық өнердің қыр-сырын таныстырды. Атап айтқанда, Динара Қоңырқызы оқушыларға қазақы нақыштағы этно-брошь жасау жолдарын көрсетіп, оның мән-маңызын түсіндірді. Сонымен қатар, Бердіғұл Құсанқызы құрақ көрпелердегі түрлі ою-өрнек түрлері мен олардың ерекшеліктері туралы айтып, ұлттық қолөнердің терең тарихымен таныстырды. Ал Ардақ Қатайқызы өз қолымен жасаған әсем қолөнер бұйымдарын ұсынып, олардың жасалу тәсілдері мен мағынасына тоқталды.
Осындай тағылымды кездесулер арқылы оқушыларымыз ата-бабадан мирас болып қалған ұлттық мұрамызды танып-біліп, халқымыздың өнері мен дәстүріне деген құрметі арта түсті. Мұндай шаралар жас ұрпақтың бойында ұлттық құндылықтарды қадірлеу сезімін қалыптастырып, рухани тәрбиесіне зор үлес қосатыны сөзсіз.
https://www.instagram.com/reel/DV87Z68iNYm/?igsh=a3JoN3JqcWlwNXdj
