Павлодар облысының білім беру басқармасы, Шарбақты ауданы білім беру бөлімінің

«Абай Құнанбаев атындағы жалпы орта білім беру мектебі» КММ
КГУ «Средняя общеобразовательная школа имени Абая Кунанбаева» отдела образования Щербактинского района, управления образования Павлодарской области

Бастауыш сынып мұғалімі — бұл тек мамандық емес, бұл жүрекпен атқарылатын үлкен миссия .

Ол – ұстаз, білімнің шамын жағушы.
Ол – үйретуші, әр баланың алғашқы қадамын бағыттаушы.
Ол – қамқоршы, мейірім мен жылулықтың қайнар көзі.
Ол – стилист, әр баланың даралығын байқап, тұлға болып қалыптасуына әсер етуші.
Ол – жанашыр, әр жетістікке бірге қуанып, әр қиындықта демеу болатын жан.
Ол – оқытушы ғана емес, тәрбиелеуші.
Ол – екінші ана.
Әріп танытып, өмірге жол ашатын осындай жандарға алғыс шексіз! ✨

https://www.instagram.com/reel/DXhMXociAXh/?igsh=NDM1MnM5eGNrc2lm

Қазіргі білім беру жүйесінде STEAM тәсілі оқушылардың жан-жақты дамуына ықпал ететін маңызды бағыттардың бірі болып табылады. География сабағында STEAM элементтерін қолдану пән мазмұнын жаңартып, оны тек теориялық емес, тәжірибеге негізделген зерттеушілік сипаттағы пәнге айналдырады.
Сабақ барысында STEAM технологиясы тиімді қолданылып, оқушылар TFA метеостанциясы мен ScienceCube сандық сенсорлары арқылы қоршаған орта туралы нақты деректер жинап, оларды талдады. Оқушылар теориялық білімдерін практикамен ұштастырып, зерттеу жүргізу, деректерді өңдеу және қорытынды жасау дағдыларын дамытты. Нәтижесінде табиғи және жасанды орта арасындағы өзара байланыс анықталып, цифрлық құралдардың білім берудегі маңыздылығы дәлелденді.
Бұл жұмыс STEAM тәсілінің оқушылардың сыни ойлауын, инженерлік және аналитикалық қабілеттерін дамытудағы тиімділігін көрсетед.

https://www.instagram.com/reel/DXhByTACInW/?igsh=MWtlaXY1cnZlaDcxZA==

2026 жылғы 16 сәуірде 9 және 11 сынып оқушыларының ата-аналарымен жоспардан тыс жиналыс өткізілді.
Жиналыс барысында келесі маңызды мәселелер қарастырылып, жан-жақты түсіндіру жұмыстары жүргізілді:
– қорытынды аттестаттауды өткізу тәртібі мен талаптары;
– 11 сынып оқушыларының ҰБТ-ға дайындық деңгейі және оқу жетістіктерін арттыру жолдары.
Сонымен қатар, 2025–2026 оқу жылында 4, 9, 11-сынып бітірушілерінің «Соңғы қоңырау» және қорытынды аттестаттау кезеңінде келесі талаптарды қатаң сақтау қажеттігі ерекше атап өтілді:
– педагогикалық әдеп нормаларын сақтау және сыбайлас жемқорлықтың алдын алу мақсатында мұғалімдерге қандай да бір сыйлық ұсынуға және қаражат жинауға қатаң тыйым салынады;
– аниматорларды, түрлі студиялар мен мерекелік агенттіктерді шақыруға рұқсат етілмейді;
– мектептің ішкі қажеттіліктеріне (жөндеу жұмыстары, санитарлық-шаруашылық заттар) байланысты білім алушылардан қаражат жинауға тыйым салынады;
– оқушылардың қауіпсіздігін қамтамасыз ету мақсатында автокөлік шеруін ұйымдастыруға, ойын-сауық орталықтарына, мейрамханаларға, дәмханаларға және өзге де орындарға баруға рұқсат етілмейді;
– мектеп ішінде де, мектептен тыс жерде де ата-аналар тарапынан мерекелік дастархан ұйымдастыруға және осы мақсатта қаражат жинауға жол берілмейді;
– қорытынды аттестаттау кезеңінде оқушылардың мектеп формасын сақтауы, тәртіпті және жауапкершілікті болуы міндетті.
Аталған талаптар 4, 9, 11-сынып оқушылары мен олардың ата-аналарының барлығына бірдей қатысты және бұл шектеулер педагогикалық әдепті сақтау, әділдікті қамтамасыз ету және сыбайлас жемқорлықтың алдын алу мақсатында енгізілгендігі баяндалды.
Жоғарыда көрсетілген талаптарды қатаң сақтау және оқушылардың қауіпсіздігіне ерекше көңіл бөлу қажеттігі ескертілді. 

Шарбақты ауданында Абай Құнанбаев атындағы жалпы орта білім беру мектебінің базасында сәуірдің 14-і күні аудан педагогтеріне арналған мазмұнды және тәжірибелік семинар өтті. Іс-шара білім беру саласында жасанды интеллект технологияларын тиімді қолдану мәселелеріне арналды. Семинарды «Шарбақты аудандық оқу-ағарту қызметкерлерінің кәсіподақ ұйымы» мен «Шарбақты ауданының білім беру бөлімі» бірлесіп ұйымдастырды. Бұл бастама педагогтердің кәсіби дамуын қолдауға және заманауи білім беру үрдістерін енгізуге бағытталды.

Семинардың негізгі тақырыбы – «Жасанды интеллект құралдарын пайдалану арқылы білім беру үдерісінің сапасын арттыру» болды. Мақсаты – педагогтердің кәсіби құзыреттілігін арттыру және цифрлық технологиялар мен жасанды интеллект мүмкіндіктерін оқу процесіне тиімді енгізу арқылы білім сапасын жақсарту.

Іс-шара барысында қатысушылар білім берудегі цифрлық платформалардың мүмкіндіктерімен танысып, сабақ барысында жасанды интеллект құралдарын қолданудың тиімді жолдарын қарастырды. Сонымен қатар толықтырылған шынайылық (AR) технологияларын пайдалану тәжірибесі де көрсетілді.

Педагогтер өз тәжірибелерімен бөлісіп, әсіресе физика және ағылшын тілі сабақтарында жасанды интеллектті қолдану жолдарын ұсынды. Оқушылардың оқу сауаттылығын арттыруға бағытталған тиімді әдістер де талқыланды.

Мектебімізден атаулы іс-шараға бастауыш сынып мұғалімі Айтжанова М.Д. «Білім берудегі цифрлық платформалар» тақырыбында қатысып, ЖИ құралдары арқылы сабақтағы тапсырмаларды қалай қызықты әрі мазмұнды етіп өткізуге болатынын көрсетіп шықты, сондай –ақ технология сабағында 3D суретті  пайдалануға болатынын көрсетті.  Ағылшын тілі пәнінің мұғалімі Бегалинова А.А. «Ағылшын тілін оқытуда AI VIBE CODING технологиясын қолдану» тақырыбында қосымшаға тіркелуден бастап тапсырманы жүктеуін рет-ретімен түсіндіріп, бөлісті. Семинар кәсіби пікір алмасу алаңына айналып, қатысушыларға жаңа идеялар мен практикалық шешімдер ұсынды. Іс-шара соңында қорытынды жасалып, рефлексия жүргізілді. Қатысушылар семинардың өзектілігі мен тәжірибелік маңыздылығын ерекше атап өтті.

Қорытындылай келе, мұндай іс-шаралар білім беру жүйесін жаңғыртуға, педагогтердің кәсіби өсуіне және заманауи технологияларды тиімді қолдануға зор мүмкіндік береді.

Бастауыш сынып апталығы барысында 2 “А” сыныбында “Ертегілер әлемінде” атты сыныптан тыс сахналау өткізілді. Ертегілерді сахналау, рөлдеу арқылы балалардың сөйлеу тілдерін, өзін ұстау, сахналық мәдениеттін дамытуға үлесі зор. Ертегілерді оқу арқылы балалар еңбексүйгіштікке, қайырымдылық, мейірімділікке, адамгершілікке, сыйластыққа,жақсы мен жаманды айыра білуге үйренеді. Жас ұрпаққа ертегілер, түрлі балаларға арналған әдеби кітаптарды оқуға деген қызығушылықтарын ояту болып табылады.

Бастауыш сынып апталығының қорытындысы ретінде
2–4 сынып оқушылары арасында «Абай – дана, Абай – дара қазақта» атты әдеби кеш өткізілді.
Аталған іс-шараның мақсаты – ұлы ақын Абай Құнанбайұлының шығармаларын насихаттау, оның мол мұрасын жас ұрпақ санасына сіңіру болды.
Кеш барысында оқушылар Абайдың өлеңдерін мәнерлеп оқып, әндерін шырқап, қарасөздерін нақышына келтіріп жеткізді. Оқушылардың сахналық мәдениеті, шығармашылық қабілеті мен өнерге деген қызығушылығы ерекше байқалды.
Барлық қатысушы оқушыларға белсенділігі мен еңбектері үшін алғыс білдіреміз! 

https://www.instagram.com/reel/DXB_fP_iH05/?igsh=c2Y2ejF5eWUxc3E3

Павлодар облысында педагогтердің кәсіби дамуын қолдау және озық тәжірибелерді тарату мақсатында облыстық «Педагогикалық шеберлік» конкурсы өткізілді. Аталған байқау білім беру саласындағы үздік тәжірибелерді анықтауға және педагогтердің шығармашылық әлеуетін арттыруға бағытталды. Аталған конкурсқа біздің мектептен 7 педагог қатысып, өз тәжірибелері мен әдістемелік жұмыстарын жоғары деңгейде ұсынды. Қатысушылар өз жұмыстарын әртүрлі бағыттар бойынша ұсынды. Атап айтқанда, инклюзивті білім беру, функционалдық сауаттылық, құндылыққа тәрбиелеу, білім берудегі менеджмент секілді маңызды бағыттар қамтылды. Байқау екі кезеңнен тұрды: сырттай және күндізгі. Педагогтер байқаудың әртүрлі бағыттары бойынша бақ сынап, кәсіби шеберліктерін көрсетті. Сырттай кезеңде қатысушылардың жұмыстары сараптамалық кеңес тарапынан бағаланып, үздік жұмыстар келесі кезеңге өтті. Күндізгі кезеңде педагогтер өз жобаларын қорғап, тәжірибелерімен бөлісті.

Қатысушылар әдістемелік әзірлемелерін, дидактикалық материалдарын және педагогикалық тәжірибелерін таныстырды. Бағалау барысында жұмыстардың өзектілігі, жаңашылдығы, практикалық маңыздылығы және нәтижелілігі ескерілді.

Конкурс қорытындысы бойынша үздік педагогтер анықталып Г.С, Амренова мен А.А Абдугалиеваға сертификаттар табысталды.

«Педагогикалық шеберлік» облыстық конкурсында  «Бастауыш білім беру» бағыты бойынша Айтжанова Махаббат Дауреновна ІІІ дәрежелі дипломмен және «Ағылшын тілі» бағыты бойынша Жумангалиева Айгерим Бегендыковна  ІІІ дәрежелі дипломмен марапатталды. Бұл конкурс педагогтердің кәсіби шеберлігін шыңдауға, тәжірибе алмасуға және білім беру сапасын арттыруға үлкен мүмкіндік берді. Осындай іс-шаралар педагог мәртебесін көтеріп, білім беру саласының дамуына оң ықпал етеді.

Бұл – мектеп ұжымының білім беру сапасын арттыру жолындағы жүйелі жұмысының нәтижесі.

Директордың ғылыми-әдістемелік жұмысы жөніндегі орынбасары: Жумангалиева А.Б.

.