Павлодар облысының білім беру басқармасы, Шарбақты ауданы білім беру бөлімінің

«Абай Құнанбаев атындағы жалпы орта білім беру мектебі» КММ
КГУ «Средняя общеобразовательная школа имени Абая Кунанбаева» отдела образования Щербактинского района, управления образования Павлодарской области

Бүгін ауданымызда жаңа оқу жылына арналған аудандық педагог қызметкерлердің дәстүрлі Тамыз кеңесі аудан әкімі С.Е. Иманқұловтың қатысуымен өтті.
Осы шара аясында мектебіміздің «Арт-студия» және «STEM зертханасы» үйірмелерінің оқушылары жасаған жұмыстарынан көрме ұйымдастырылды. Көрмеде оқушылардың шығармашылық ізденісін, еңбегін және заманауи технологияларға қызығушылығын танытатын жұмыстар көпшілік назарына ұсынылды.
Бүгінгі көрме арқылы мектебімізде қолға алынған жаңа бағыттағы жұмыстар аудандық педагогтер қауымына таныстырылып, тәжірибе алмасуға жақсы мүмкіндік берді.
Көрмені тамашалау барысында аудан әкімі Сержан Ерғалымұлы оқушылардың жұмыстарына қатысты өз ұсыныстарын білдіріп, аудан тұрғындарының назарын аударатын, көпшілікке қызықты болатын жаңа жобаларды қолға алуды ұсынды. Бұл ұсыныстар оқушылардың тың идеяларын дамытуға, өз еңбектерін одан әрі жетілдіріп, көпшілікке ұсынуына жаңа серпін береді деп сенеміз.
Жаңа оқу жылы жаңа ізденістерге, жақсы бастамаларға және нәтижелі еңбекке толы болсын!

https://www.instagram.com/reel/DcRO3UQONcR/?igsi=MTg1YXRyYmZnZ2V3dA==

Жаңа оқу жылы қарсаңында «Мектепке жол» республикалық қайырымдылық акциясы аясында аз қамтылған және көпбалалы отбасылардан шыққан балаларға қолдау көрсетуге шақырамыз.
Әр баланың мектепке қажетті құрал-жабдықтармен толық қамтамасыз етіліп, жаңа оқу жылын жақсы көңіл-күймен бастауына жағдай жасау – баршамызға ортақ міндет.
Сіздер акция аясында балаларға рюкзак, мектеп формасы, спорттық киім, аяқ киім, кеңсе тауарлары және басқа да мектепке қажетті оқу құралдарымен көмек көрсете аласыздар.
Көрсетілген әрбір көмек – бала үшін үлкен қуаныш, отбасы үшін маңызды қолдау. Өз мүмкіндігіңізге қарай жасаған қайырымдылық көмегіңіз арқылы бір баланың мектепке алаңсыз әрі толық дайындықпен баруына себепші бола аласыз.
Балаларға қолдау көрсетіп, олардың білім алуға деген алғашқы қадамына бірге демеу болайық. Жақсылық жасау үшін үлкен мүмкіндік күтудің қажеті жоқ. Кішкентай ғана көмек бір баланың көңіліне үлкен қуаныш сыйлауы мүмкін.
«Мектепке жол» – балаға қолдау, болашаққа жасалған қамқорлық!
Баршаңызды қайырымдылық акциясына белсенді қатысуға шақырамыз!
Бірге көмектесейік, бірге қолдайық!

11.08.2026 ж. Тікелей эфир архивінен.
«Мектепке жол» акциясы аясында жерлестермен және ата-аналармен тікелей эфир өткізілді.
Тікелей эфир барысында жаңа оқу жылына дайындық мәселелері, акцияның мақсаты мен міндеттері, сондай-ақ оқушыларды мектепке қажетті оқу құралдарымен қамтамасыз ету бойынша атқарылып жатқан жұмыстар туралы ақпарат берілді.
Сонымен қатар мемлекет тарапынан көрсетілген әлеуметтік қолдау аясында қаржылай көмек алған 81 оқушы бойынша жалпы мәлімет берілді. Аталған оқушылардың жаңа оқу жылына қажетті оқу құралдары мен киім-кешектерін алуына көрсетілген қаржылай көмектің маңыздылығы атап өтілді.
Тікелей эфир барысында ата-аналарға әлеуметтік қолдау көрсету жұмыстарының ашықтығы мен жүйелілігі түсіндіріліп, ата-аналардың сұрақтарына жауап берілді.
Іс-шараның негізгі мақсаты – ата-аналарға «Мектепке жол» акциясы аясында атқарылып жатқан жұмыстар туралы толық ақпарат беру және әрбір оқушының жаңа оқу жылына сапалы дайындалуына жағдай жасау.

https://www.instagram.com/reel/Db7qKyZM2lv/?igsh=aHFoOTY4cm00Y3k4

11 жыл бойы білім нәрін сіңіріп, балалық шағын білім ордасында алаңсыз өткізген жас түлектер алтын ұясымен қоштасты. «Әліппеден» бастап, өмір заңдылықтарына дейін үйреткен ұстаздардың шәкірттермен қоштасу сәті көңілге қимастық сезімін ұялатты. Соңғы қоңырау соғылған күні түлектердің болашағына ақ жол тілеп, қолдау білдірудің мәні жоғары. Осындай әсерлі салтанатты іс-шара Абай Құнанбаев атындағы жалпы білім беру мектебінде өтті. Әсем безендірілген білім ордасының ауласына жиналған 19 ұл-қыз үлкен өмірге қанат қақты. 32-інші түлектердің сынып жетекшісі, білікті ұстаз – Ерболат Дәлелханұлы. Биыл 9 сыныпты да 19 оқушы тәмамдап отыр. Бұл екі сыныпқа Айжамал Мадатқызы мен Тұмар Маралұлы жетекшілік етті.
Іс-шарада сөз алған мектеп директоры Нұрмира Өміржанқызы алтын ұядан ұшқалы тұрған мектеп бітірушілерге ақжолтай тілегін арнап, ұстаздарды мерекемен құттықтады. - Мектебіміз оқу жылын табысты аяқтады. Оқушыларымыз білім жолында жақсы жетістіктерге қол жеткізді. Биыл 59 шәкірт білім үздігі, 132 оқушы екпінділер қатарынан көрінді. Білім сапасы көрсеткішінің 70,5 пайыз болуы өнімді еңбектің нәтижесі екені анық. Ал мектеп бітірушілер үшін алтын ұямен қоштасу ерекше күн. Алдағы өмірлеріңізде еңбекқорлықтарыңыз бен білімдеріңіз сіздерді әрқашан биікке жетелей берсін. Біз сіздерді әрқашан мақтан тұтып жүрейік! Ұлттық бірыңғай тестілеуде мерейімізді үстем етеді деп сенім білдіремін,-деді мектеп басшысы Нұрмира Жакупова.Шарбақты ауданы
Полиция бөлімі басшысының міндетін атқарушы
полиция подполковнигі
Алмас Баймбет те шәкірттерге сәттілік тіледі.
– Білім мен тәрбиенің қасиетті ордасында тағы бір оқу жылы қорытындыланды. Мектептегі сәттер – жүректе қалатын жылы естелік. Үлкен өмірге қанат қаққалы тұрған жастардың қадамы құтты болсын! Қанаттарыңыз ешқашан талмасын! Ата-аналарыңыз бен ұстаздарыңыздың үмітін ақтаңыздар! Әрдайым жолдарыңыз ашық болып, арман-мақсаттарыңызға жете беріңіздер!-деді Алмас Айтмухаметович Баймбет.
Ата-аналардың атынан сөз алған аудандық мәслихаттың төрағасы Гүлмира Смайлханова да шәкірттердің жетістігі ұстаздардың еңбегі екенін айтты. Түлектерге білім жолында ақ жол тіледі.
Одан кейін мектеп бітіруші шәкірттердің алғашқы ұстаздары Гүлдана Қалыбекқызы мен Гүлден Әлиқызы шәкірттеріне жүрекжарды жылы лебізін білдірді. Ұстаздар оқушылардың мектепке келген сәтінен бастап естеліктерді еске түсірді. Балалық шаққа саяхат жасап, аңғал күлкі, қолға қалам ұстаған сәт, білім нәрімен сусындаған күн – бәрін айтып берді. ҰБТ-да жоғары ұпай жинап, қалаған оқуға түсіп, мықты маман болуларына тілектестігін білдірді.
Оларға ризашылық ретінде 4 «а» сынып оқушылары Мөлдір Тоқтамыс пен Нұркелді Бағдатұлы әдемі ән орындады. Мұнан соң мектеп директоры Н. Жакупова оқу үздіктерін марапаттады. Түлектер Алтынай Тоқтамыс пен Сәттігүл Исабек «Соңғы қоңырау» әнін көпшіліктің назарына ұсынды.
1 сынып оқушылары Асылай Айтпай, Наргиз Баисова, Таңиіс Қаңтарбай, Айлин Тайтелі жыр шумағын арнап, ыстық лебіздерін білдірді. Салтанатты іс-шара әсем әуен ырғағымен вальс биімен жалғасты.
Ал 1 сыныптың үздік оқушысы Кәусар Оразбек және 11 сыныптың түлегі Эльдар Гостишев қоңырау соқты.
Бұл – жаңа мүмкіндіктер мен үлкен жетістіктерге бастайтын жолдың бастауы. Абай есімін иеленген білім ордасының жеткен жетістіктері аз емес. Биыл мектеп бітірген 19 түлектің 1-і «Алтын белгіге», 3-і үздік аттестатқа үміткер.
Түлектерді алда нағыз білім бәсекесі – ұлттық бірыңғай тестілеу күтіп тұр.